Logo

సికింద్రాబాద్ విధ్వంసం కేసు.. సుబ్బారావుదే మాస్టర్ ప్లాన్, పక్కా ఆధారాలు లభ్యం

దేశవ్యాప్తంగా తీవ్ర సంచలనం కలిగించిన సికింద్రాబాద్‌ రైల్వేస్టేషన్‌(Secunderabad Railway Station)పై దాడి కేసులో ఏపీలోని పల్నాడు జిల్లా(Palnadu District) నరసరావుపేటకు చెందిన సాయి డిఫెన్స్‌ అకాడమీ డైరెక్టర్‌ ఆవుల సుబ్బారావు(Avula Subbarao) పాత్ర ఉందని రైల్వే పోలీసులు తేల్చారు. స్టేషన్‌లో విధ్వంసం సృష్టించాలన్న ప్రణాళిక, కార్యచరణను సుబ్బారావు దగ్గరుండి పర్యవేక్షించినట్టు పోలీసులు పక్కా ఆధారాలు సేకరించారు. సుబ్బారావు తన అనుచరులతో కలసి ఆర్మీ(Army) ఉద్యోగ అభ్యర్థులను రెచ్చగొట్టడం ద్వారా సికింద్రాబాద్‌ రైల్వే స్టేషన్‌లో విధ్వంసానికి ప్రేరేపించినట్లు విచారణలో తేలింది. దీంతో ఆవుల సుబ్బారావుతో పాటు మల్లారెడ్డి, శివ సహా ఐదుగురు కీలక నిందితులను అదుపులోకి తీసుకున్న హైదరాబాద్‌ టాస్క్‌ఫోర్స్‌ పోలీసులు వారిని తదుపరి చర్యల నిమిత్తం సికింద్రాబాద్‌ గవర్నమెంట్‌ రైల్వే పోలీసులకు(Government Railway Police) అప్పగించారు. వీరి అరెస్ట్‌ను నేడు అధికారికంగా ప్రకటించే అవకాశముంది.

అగ్నిపథ్‌ పథకం(Agneepath Scheme) ప్రకటనతోనే భారీ ఆందోళనలకు పథకం వేసిన సుబ్బారావు, వీలున్నంత వరకు తన పేరు బయటకు రాకుండా ఉండాలని భావించాడు. దీంతో తన అకాడమీలకు డైరెక్టర్లుగా, ఇన్‌స్ట్రక్టర్లుగా ఉన్న ఐదుగురిని రంగంలోకి దింపాడు. వీరిలో మల్లారెడ్డి, శివ కీలకమని పోలీసులు చెబుతున్నారు. జూన్‌ 16న సుబ్బారావు తన అనుచరులతో గుంటూరు నుంచి హైదరాబాద్‌ చేరుకుని సికింద్రాబాద్‌ రైల్వేస్టేషన్‌ సమీపంలోని ఓ హోటల్‌లో దిగాడు. శివ, మల్లారెడ్డితో మాట్లాడి. వారి ద్వారా ఆర్మీ అభ్యర్థులను రప్పించుకుని ఆ రోజు రాత్రి సమాలోచనలు జరిపాడు. మూకుమ్మడిగా రైల్వేస్టేషన్‌లోకి వెళ్లి దాడులు చేయాలని అభ్యర్థులకు సూచించాడు. వారికి మద్దతుగా తన అనుచరులను మాస్కులతో రైల్వేస్టేషన్‌కు పంపించాడు. ఆర్మీ అభ్యర్థులు విధ్వంసం మొదలుపెట్టిన కొద్దిసేపటికే సుబ్బారావు గుంటూరుకు పారిపోయాడని రైల్వే పోలీసులు తెలిపారు. ఆందోళనలో పాల్గొన్న అభ్యర్థులకు ఫీజులో రాయితీ ఇస్తానంటూ చాలామందిని ప్రలోభపెట్టి విధ్వంసానికి ప్రేరేపించాడని జీఆర్పీ పోలీసులు గుర్తించారు.

రైల్వేస్టేషన్‌పై దాడి కేసులో సుబ్బారావు ప్రమేయం ఉందని రైల్వే పోలీసులు ముందునుంచీ అనుమానిస్తూనే ఉన్నారు. దీంతో అతడిని అరెస్ట్ చేసేందుకు 19న నరసరావుపేట(Narasaraopet) వెళ్లగా తనకేం సంబంధం లేదని బుకాయించాడు. అయితే కొన్ని ప్రశ్నలకు సమాధానాలా కావాలని చెప్పిన పోలీసులు అతడిని హైదరాబాద్‌ తీసుకొచ్చారు. ఈలోగా సుబ్బారావు అనుచరులు శివ, మల్లారెడ్డి, మరో ముగ్గురిని టాస్క్‌ఫోర్స్ పోలీసులు అరెస్ట్ చేశారు. విచారణలో విధ్వంసంతో సుబ్బారావుకు సంబంధం ఉందని వారు చెప్పడంతో కేసు నమోదు చేశారు. గురువారం అర్ధరాత్రి సుబ్బారావు, అతడి అనుచరులను అదుపులోకి తీసుకున్న జీఆర్పీ పోలీసులు వారిని రహస్య ప్రాంతానికి తరలించి విచారిస్తున్నారు. శుక్రవారం అరెస్ట్‌ చేసి కోర్టులో హాజరుపరచనున్నట్టు విశ్వసనీయ సమాచారం.

About the Author

Leave a Reply

*